Artêşa Îraqî û Haşdî Şabî kewtî Kerkûk

Artêşa Îraqî û hêzê Haşdî Şabî bi hetkarîya Pasdaranê Îranî êrişê Kerkûkî kerd. Pêşmergeyê ke girêdayeyî YNKyî cepheyê xo terk kerd û Haşdî Şabî kewt zafê Kerkûkî girewt bin destê xo.

Serdarîya Pêroyî ya Hêzê Pêşmergeyan derheqê êrişê Kerkûkî de beyanatêk weşana.
Goreyê beyanatî, nişkara tayê serdaranê Pêşmergeyan ke pabesteyê YNKyî bî, cepheyê başûrî yê Kerkûkî û tayê qezayanê Kerkûkî terk kerdo û artêşa Îraqî kewta nê cayan.

Goreyê îdîayan nê serdaran ra Pavel Talabanî û Lahur Talabanî bi hetkarîya Qasim Suleymanî hukumatê Îraqî û Îranî reyde peymanêko nimitkî kerdo, cora Kerkûkî teslîmê Haşdî Şabî kerdo.

YNK ra Kosret Resûlî û tayê hêzê Zêrevanî waşt ke cepheyê vengan newe ra dekê û cepheyan newe ra tenzîm bikê la sernêkewtê.

Fermandarê Pêşmergeyan ra Cafer Şêx Mistefayî zî va ke apey ancîyayîşê pêşmergeyan rast bi. Mistefayî wina va: "Artêşa Îraqî zaf hêzdar bî, cora qerarê apey ancîyayîşÎ rast bi. Ez heme mesulîyetê nê qerarî gêno xo mil."

Tûzxûrmatû, Daqûq û zafê taxê Kerkûkî nika kewtî destê artêşa Îraqî û Haşdî Şabî. Zaf cayanê bajarî de alaya Kurdistanî bi destê mîlîsanê Haşdî Şabî ameyê war.

Goreyê xeberanê ajansan, tayê kesan suîkast bi Walîyê Kerkûkî Necmedîn Kerîmî kerd yan zî waşt ke ey biremnî la sernêkewtî.

Berpirsîyarê Kurdîstanî rexne kerd ke artêşa Îraqî bi çekanê DYA êrişê înan kena. Labelê serekê DYA Donald Trump beyan kerd ke ê beyntarê Îraq û Kurdistanî de destê kesî nêgênê.

Îranî berê sînorî padayê û amadekarî keno ke sînoranê Îranî teslîmê Haşdî Şabî biko. Tirkîya zî ewro MGK de qerar girewt ke sehaya hewayê xo Kurdistanî rê pado û berê sînoran teslîmê Îraqî biko.
Seba babetanê têkildaran menuyanê cêrênan bitiknê:

Bitikne & Biwane / Babetê Têkildar: