Hewlêrî seba ‘qedexeyê firayişî’ vengda Netewêyê Yewbîyayî

"Referandumê Xoserîye" ra dima dewletê Îraq, Tirkîya û Îran wazenê ke Kurdistanî ser o ambargo ronê. Na yewe ra, hukumatê Bexdadî, herêmê Kurdistanî ra waşt ke heme rasteyê teyarayan teslîmê hukumetê merkezî yê Îraqî biko.

Labelê hukumatê Kurdistanî no waştiş qebul nêkerd. Hukumatê Îraqî bi nê behaneyî Kurdistanî ser o "qedexeyê firayişî" îlan kerd û dewletanê bînan ra zî waşt ke nê qedexeyî bîyarê ca. 

Tirkîya û Îranî qerar da ke nê qedexeyî bîyarê ca. Tirkîya vizêr ra nat heme firayîşanê teyareyan vindarna.

Hukumatê Kurdistanî, vengda Netewêyê Yewbîyayî (NY) û Îraqî ke bi nê qerarî şarê Kurdistanî yeno cezakerdiş, cora gereka no qerar bêro betalkerdiş.

Temsîlkarê Hukumetê Kurdistanî Sefîn Dizayî beyanatê xo yê nuştekî de wina va:

"Bexdad bi nê qerarî reyna kanunê esasî îhlal kerdo. No cezakerdişê şar û komelê Kurdistanî yo. Kurdistan hetanî nika rîayetê kanunanê Îraqî kerdo. Meydanê teyarayanê ma yê Hewlêr û Silêmanî zaf reyan hetê Îraqî ra kontrol bîyê û ameyê teqdîr kerdene.

Bi nê qerarî Kurdê Êzidî, Îsewî û Erebê Sunnî ke şerê DAIŞî de mexdûr bîyê û mecbûr mendî ke şêrê teberê welatî do keye û eqrebayanê xo nêeşkê bivînî.

Bi nê qerarî fealîyetê zafê karsazan vindert. Heqê seyahetê yê hemwelatîyanê Kurdistanî îhlal bîyo. No qerar duştê Peymana Chicago yo. Ma waşt ke terefê têkildarî bêrê têhet û qisey bikê la heme waştişê ma red bîyê.

No qerarêko sîyasî yo. Hukumatê Kurdistanî, vengdano Netewêyê Yewbîyayî (NY) û Hukumatê Îraqî ke nê qerarî betal biko."
Seba babetanê têkildaran menuyanê cêrênan bitiknê:

Bitikne & Biwane / Babetê Têkildar: