Tirkîya
Tirkîya 22ê Elule de kombîyayîşê MGK ard vernî û hemberê referandumî de qerar girewt. Tirkîya waşt ke referandum talûq bo, nê ke do Tirkîya netîceyanê referandumî nêşinasno û hemberê Kurdistanî de tedbîranê ekonomîk, dîplomatîk û eskerî bigîro. Meclîsê Tirkîya bi yew tezkere selahîyet da artêşa Tirkîya ke bişîyo esker bierşawo Surîye û Îraq.Serekkomarê Tirkîya Recep Tayîp Erdoganî, Kurdistano Başûr tehdît kerd û va “Ma referandumê Vakurê Îraqî nêşinasnenê. Ma no hewte sînoran padanê. Nika ra pey îdareyê Vakurê Îraqî petrolê xo senîn roşeno? Vana ma de ya. Wexto ke ma pada, o kar zî qedîyeno. Ma nêverdanê ke sînoranê ma de dewletêka terorî ronîya. Nê heme hewn ê. Ma destûr nêdanê, ma do şewêk nişkera bêrê.”
Sûrîye
Goreyê ajansa SANA, wezîrê teberî yê rejîmê Esedî Welîd Muallîmî va ke “Ma tena Îraqo yewbîyaye şinasnenî, ma her proseso ke Îraqî lete keno, red kenê”. Goreyê vatişê Muallimî, ê referandumê Kurdistanî nêşinasnenî û nê tewrê xo wezîrê teberî yê Îraqî ra vato.Îran
Serekkomarê Îranî Hasan Ruhanî hem serekkomarê Tirkîya Tayîp Erdoganî reyde hem zî serekwezîrê Îraqî Heyder el Îbadi reyde bi telefone qisey kerd. Nê qiseykerdişan de Ruhanî va ke “ma sey Îranî, yewbîyayîşê Îraqî pawenê û duştê referandumî de yê. Ma û Tirkîya na mesela de Bexdadî desteg kenê.” Hereketê sey Hizbûllah û Haşdî Şabî ke nêzdîyê Îranî yê, ê zî duştê referandumê vejînê.Îraq
Serekwezîrê Îraqî Haydar El Îbadî va ke “referandum duştê kanunê esasî yê Îraqî yo. Netîceyê ey se beno wa bibo meşrû nîyo. Ma nê xusûs de muzakere nêkenê. Îdarekarê Kurdistanî zî wa parçekerdişê Îraqî nêfikirîyê.” Serekwezîro kehen û hetkarê serokkomarê Îraqî yo nikayin Nurî Malikî zî îdîa kerd ke no referandum hemberê yewîya Îraqî de îlanê şerî yo. Nûrî Malikî sey sîyasetkarêko mezhebperest û qetlîamker şinasîyeno.
Seba babetanê têkildaran menuyanê cêrênan bitiknê: